中年好聲音2｜劉可贏憂鬱奪五燈陳俞霏改編歌曲獲讚林潔淇以經歷鼓舞人心

第一位 5 燈選手是 36 歲的劉可，他挑戰女歌男唱獻唱莫文蔚的《他不愛我》，他憑獨特的唱法贏得評審一致好評，惟他獲得 5 燈後看似心事重重，周國豐笑言：「佢係唯一一個拎咗 5 燈都好似冇事發生咁，好似仲唔開心過我哋！」劉可即皺着眉解釋：「因為前幾日感冒，又有啲咳……」肥媽聞言激動彈起身說：「你依家咩意思，畀成 5 盞燈你，你話自己狀態好差？」場面搞笑。唱功了得的劉可性格比較含蓄兼帶點搞怪，伍仲衡讚他有性格：「我幾鍾意佢，咁樣先係 Artist！」陳慧嫻則笑言：「我覺得你好似飲醉！」引得全場大笑。第二位 5 燈選手是 35 歲的陳俞霏，報稱是音樂搬運工的她以一頭粉紫色短髮示人，甚有個性。陳俞霏選唱歌曲是《拒絕再玩》，更親自為歌曲重新編曲，其充滿個性的演出最終獲得 5 燈佳績，伍仲衡說：「玉置浩二嘅 Melody 你都夠膽改，你真係犀利！」陳慧嫻大讚：「你個 Rhythm 好出、好 Groovy，我自己都一路聽一路喺度 Un。」

獻唱《舊夢不須記》的林潔淇雖然只獲 1 燈成績，但她背後的故事卻十分感人。現年 60 歲的林潔淇是一名退休人士，亦是一名乳癌康復者，她說：「乳癌之後做6 個大手術，依家有 11 科要覆診，我係一個長期病患者，但我都好堅強，好想話畀同路人知道，病咗都可以有精彩人生。」除了患過大病，林潔淇的人生經歷同樣十分坎坷，她說：「最傷心嘅事，係我個囡囡喺 2 個半月大時，畀保母虐待致命，呢件事纏繞咗我兩年，我日頭裝作冇事，但一收工就會好難過，一上車就會流眼淚。」

豈料壞事接二連三，後來輪到細女險出事，她說：「後尾生咗細女，亦都係婚姻破裂，佢個姑姐抱住佢衝去露台想掟佢落街，當時我用盡全身力量攬住佢衝出門口。人生係好多經歷，當時我係冇晒錢，之後我好努力工作，捱大咗我個女兒，依家個女鼓勵我參加比賽。」經歷人生種種，林潔淇全靠音樂治療心靈，她說：「我人生咁多經歷，都係全靠聽歌先可以堅強企喺度，希望遇到困難嘅人，都可

以好似我咁堅強，為你自己目標邁進，我得你哋都得㗎！」

眼淺的肥媽和車婉婉感動到得爆喊，肥媽更哽咽解釋做「一燈大師」的原因：「好多人問我點解成日都畀燈，能夠企得上《中年》100 強唔係一件容易嘅事，撳一撳燈亦唔係好難，我覺得每一個能夠企到上嚟，係值得我哋畀一盞燈嘅！」場面感人。事後林潔淇姐姐受訪時，大拋勵志 Bite 鼓勵同路人：「遇到幾多困難都好，你要知道你並唔係孤單，希望大家都可以把握人生嘅黃金機會，做你自己鍾意做嘅嘢，做你自己開心嘅嘢，唔好畀自己過去嘅事纏繞自己，將所有打擊變成燃料推動力，今生無悔、今生無憾。」