《直播靈接觸》紅衣女鬼身份揭祕 彭翔翎為追夢賣愛車 揸士增收入
追夢路上不易與決定
彭翔翎在追求演藝夢想的路上，曾經歷不少困難和挑戰。「開始難，守著更難！」她坦言，成為正式演員後，發現現實與想像中的差距很大：「我想像中係好易，覺得自己能力HANDLE到，原來非常難，那怕一句對白兩句對白，你要用對白再加戲去表達一啲嘢係好難。」此外，她還要面對入行初期收入不足和無止境的等待機會。為了繼續追夢，她甚至賣掉了愛車，這對於喜歡開車的她來說，是一個非常大的決定。「隨住儲蓄一路無，我連車都賣埋，為咗追夢可以叫做捨棄一切，再自己重新慢慢揾個可行嘅方向去行。」
意想不到兼職選擇
為了增加收入支持自己的夢想，彭翔翎選擇了一條大家都沒想過的路—成為的士司機。「追夢是一件非常困難嘅事，首先你要維持到生活先。喺TVB做咗7年，一開頭都還可以靠自己啲積蓄，演員嘅身份，你唔會知道幾時有通告。如果你要喺出邊揾工有啲難度，因為你要畀更表人，無咩工作接受到你突然間請假，捱咗咁多年之後，的起心肝去揾一份可行嘅工作去兼顧。我又鍾意揸車，以前都有揸車，試下考的士牌，的士可以做工作又彈性啲，試咗之後OK，考的士牌都係為咗追夢。」彭翔翎揸紅的，九龍新界都會去，她初入行得行家教路，提她準備坐墊，「要有幾部機睇多啲台，街客有時較短途，多一個平台多一個選擇，裝啲台，教我要有散銀盒，打氣（入油）。當然最重要係提我去廁所一定要鎖門！」她指自己只會揸日更，即凌晨5點至下午5點，「因為我怕鬼又怕黑，危險反而唔太驚，我幻想唔到我遇到呢啲情況，可以點處理，所以只返早更。我曾試過遲交車，同車行講，因為有客交唔到車，咁無辦法，就接埋夜更。因為我始終都係驚，所以當遊車河。」當被問到有試過被觀眾認出嗎？她笑言沒有，「我平時開工會戴帽同口罩，未試過被人認到。」彭翔翎樣子甜美，更被獲封「最靚的士司機」，靚女揸的士就少不免會被「抄牌」？「都有多客問我拎電話，又問『會唔會日日揸車，我以後都CALL你車。』另外，都試過行錯路，對方只係話：『靚女睇你咁後生，你都係新揸，唔緊要，最重要安全。』『同你傾計好開心。』」收入忽高忽低靠勤力幫補 揸的士最高每日收入是..?收入方面，彭翔翎笑言自己無「師兄」咁叻，她口中的師兄就是在《愛·回家之開心速遞》飾演「書蟲」的林浩文，他是翔翎同期訓練班好友，現時也有兼職揸的士搵銀。彭翔翎笑言：「我哋同期入行揸的士，介紹咗行家畀佢。有次食飯果陣講起，佢試過最多一日可以揾3千蚊，我最勁最多2千淨袋，但我好勤力，我會走好多轉。最差試過一兩個鐘接唔單，因為我蠢囉，正常要識玩呢個遊戲。當時我喺屯門一個地方，望住個台，一見到有單想搶，但唔夠人搶。其實我應該要一路碌，睇下邊個地方會多啲客，去果邊行下。」目擊輪椅長者搭的士被拒載感心酸 無懼被呠堅持落車協助揸的士可以見到很多人生百態，翔翎分享自己最深刻是看到拿拐杖或坐輪椅的長者們很難截的士。「我遇到5至6次，佢哋一上車就話：『真係好啦，終於接我。』因為呢啲CASE 我一定會落車幫佢哋開門，幫佢搬輪椅，就算有姐姐陪同都會幫忙。我覺得佢哋好慘，其實佢哋好可愛，一上車都會笑，同我傾下閒計。往往就係因為動作比較慢，可能阻到後面被呠，但我都唔理，慢慢嚟慢慢嚟，最緊要安全。」現時翔翎暫時沒有再兼職揸的士，而是找了一份文職工作，「當時的士揸咗兩個月，有朋友喺IG INBOX我話：女仔人家唔好揸的士，咁辛苦。不如你嚟我公司幫手，我請你做全職，最多你提早一日請我講聲，我畀你放假，扣人工便可。」她指自己會暫時做OFFICE先，始終的士牌和裝備還在，如有需要都可以隨時再做。追夢獲家人支持 辛苦但無悔追夢路上家人的支持十分重要，翔翎指：「屋企人好FREE，永遠鼓勵我，你鍾意做咩就咩，最重要我開心。FREE到直頭無問過我拎家用，呢種係非一般鼓勵。都有愧疚過自己，都咁大個人，係咪要進取啲呢，盡量揾多啲錢，有機會報答佢哋。」（有無後悔過自己這個選擇？）「無，無後悔過，因為細個已經好想做演員，唔係為出名，係想演好一個角色，那怕係演一個唔見樣嘅女鬼，我都好ENJOY投入去做，因為鍾意演，好鍾意玩古靈精怪嘅嘢，所以無後悔過，好開心，有好多經歷，多咗好多歷練。」延伸閱讀 直播靈接觸｜紅衣女鬼真實身份終曝光！彭翔翎私下原來勁靚女 為續演戲夢願做一事
