草蜢三子熱血開騷 《芷珊約您》直擊高雄巨蛋演唱會

昨晚播映的《芷珊約您》節目中，特別嘉賓為樂壇常青組合草蜢。節目主持黎芷珊親赴臺灣，實地採訪了草蜢在高雄巨蛋的演唱會。這支組合自成軍以來已有39年歷史，而這次的高雄演唱會，更是他們繼30年前後再次在此地舉行的大型演出。三位成員蔡一智、蔡一傑和蘇志威在舞臺上全力以赴，將現場氣氛推向最高潮。

深度專訪揭祕草蜢心聲

演唱會結束後，黎芷珊對草蜢三子進行了一場深入的專訪。在訪問中，芷珊詢問三子對於十年後的草蜢有何展望。「歷史都係人創造，你6、70歲仲喺上面跳，唔係唔得㗎喎！」蘇老闆毫不掩飾地表達了他對年齡的無懼。蔡一傑也表示了他的支持：「唔好畀自己太多阻礙同藉口，盡做吖，將自己發揮到最好為止。」當問及是否感到現在的生活快樂時，三子齊聲表示快樂，並坦言他們的39年歌唱生涯充滿了驚喜。「諗番自己出道，十幾廿歲到依家，好幸運我哋幻想出嚟嘅嘢都成為現實，仲要做得幾好添，所以好感恩。」蔡一傑感慨地說。蔡一智則回憶起他們的出身背景：「我哋三個係屋邨仔之嘛，讀書仲係渣添啦，以前以為成功唔到㗎喇，但依家係做到Famous喎，講緊去到邊度都有人識你喎，嗰時係幾難想像。」

草蜢三子揭露從前艱辛

在節目的最後，草蜢三子應芷珊的要求，分享了他們早期事業的一段不為人知的艱難歲月。蔡一傑透露：「我哋開始出道攞咗新人獎，入行差唔多7年，之後都攞咗好多獎，喺出面其實都叫幾紅，但係我哋其實仍然係好窮，嗰時仲係住緊喺屋邨，好多隔籬鄰舍會帶好多同學嚟睇，我哋真係冇辦法、瞓唔到覺，逼於無奈要搬出去，搬出去之後，我哋嘅錢只係夠買三張床褥，之後係咩都冇。」

成奎安的暖心舉動

蔡一傑繼續分享了他們的好友成奎安在困難時期給予的幫助。「嗰時成日同大傻成奎安一齊出去玩，玩完之後佢送我返屋企，佢係都要上嚟屋企坐，我話唔好啦，但佢死都唔肯，最終都上咗嚟屋企，佢一打開門冇諗過我屋企係咁，就連一張櫈都冇，佢坐咗喺地下，佢話冇櫈坐啫，畀杯水嚟飲嚇都得啩，我話對唔住，我屋企連雪櫃、水煲都冇，當時我哋係窮到咁，嗰個年代表面係風光，內裏其實好慘，第二日大傻搵朋友送咗張梳化嚟畀我，係我屋企第一張嘅梳化。」蔡一傑回憶起已故的成奎安，感慨萬分：「好多謝大傻，雖然佢已經唔喺度，但我仍然好掛住呢個人。」