999999《超時空男臣》「三妹」 陳偉琪 封胸做自己

陳偉琪 港姐第五名

陳偉琪 現年26歲，曾經參選2011年溫哥華華裔小姐競選成功奪得亞軍，之後再戰2013年度香港小姐競選，當時被封為「翻版陳妍希」， 同屆有陳凱琳、蔡思貝及劉佩玥等人。Vicky最後喺決賽排名第五位，更獲得現場最受歡迎佳麗獎。佢其後參加無綫藝員訓練班，正式成為合約藝人。

當人人將重點放喺Vicky嘅身材上，其實佢嘅學歷同樣值得注意。原來Vicky喺University of British Columbia (UBC) 畢業，主修政治及哲學系，絕對係美貌、身材與智慧並重！

靠 「 三妹 」一角入屋

入行短短幾年，其實Vicky都拍過唔少劇集，包括《賭城群英會》、《與諜同謀》、《幕後玩家》等都見到佢嘅影子。不過，今次喺《超時空男臣》入面佢終於可以收起性感形象，戴起冷帽，着返衛衣長褲，做返佢認為真實嘅自己。佢喺劇中飾演「 三妹 」，經常孖住田蕊妮、朱晨麗等人出場，戲份都唔少㗎！重點係佢今次終於唔係演又貪錢又袒胸露臂嘅無名小花啦！對於「初次從良」，佢自己都話好開心，可以發揮自己實力，感動到差啲喊出嚟，誇張到連監製都叫佢唔好咁激動呀！