厚顏30歲黃心穎深潛8個月後回歸 發毒誓戒淫搏翻身
黃心穎背馬明姣淫許志安 藉《牛下》網上試水溫
今年4月黃心穎背住當時男友馬國明在車內姣淫人夫許志安，結果兩敗俱傷，黃心穎冇面見人飛美國避世，前途盡毀。深潛8個月後，隨住劇集《牛下女高音》見光，黃心穎在社交網蒲頭試水溫，上周六（14日）更進一步行動，高調飛返香港，黃心穎在無綫安排下，由多位經理人護身，步出香港機場見記者，谷盡眼淚hea住道歉博好感，卻不時偷笑換來反感。
深潛8個月後發福見記者即扮慘谷眼淚
深潛多月好食好住，黃心穎身形與面形都明顯發脹，重妝下面容浮腫，更配合民情刻意扮成楚楚可憐的樣子。行出禁區見在場大批記者等著採訪，本來嘴角帶笑意的她突然低下頭培養感情，再抬頭時剛好行到記者堆前，黃心穎已熱淚盈眶，校準時間眼淚鼻涕直流。
搏翻身發毒誓戒淫 硬頸唔肯講「對唔住」零誠意
雖然黃心穎一早準備好台詞，表面上是承認自己所做的錯事，不過硬頸的她依然沒有親口講出一句「對唔住」或對受影響的其他人講出道歉說話，期間有否聯絡馬明及安仔，她忍住笑意拒絕回應，難怪她回港後，大部分網民都指她全沒誠意，一面倒給予負評及鬧爆她，更質疑她為返港大翻身做「大龍鳳」，不過扮慘演技卻唔夠班。
無綫欲放生聖誕過後會安排工作
12年參選港姐入行的黃心穎，很快就受到無綫力捧，上位成為當家小花，而一直對她寵愛有加的無綫助理總經理（藝員管理及發展）樂易玲就黃心穎回歸一事回覆傳媒時表示，目前會先讓她休息，給時間她陪家人，過完聖誕再傾工作的事，看來無綫將重新給予機會及早已有所安排。
厚顏黃心穎道歉台詞全篇：
黃心穎：「大家好，好耐冇見，我好開心因為我終於返到屋企喇！我好想藉住呢個機會多謝一啲人，我有啲好好嘅朋友，好好嘅同事，尤其係我屋企人，辛苦晒佢哋，甚至乎有啲唔係好識嘅人，佢哋都會send messages嚟或者留言，去畀咗好多力量我今日企喺呢度。喺過去差唔多8個月，都係好努力咁生活啦！雖然外界有好多嘅猜測，但我只不過係喺度好努力咁生活。I made a mistake，and I try really hard to live with it，to learn from it，但同時我都覺得我要 Move on喇！我都想繼續向前行、向前望，無論係我想講嘅、要講嘅，私底下同公開我都講咗，所以喺呢件事上面，我都唔會再有任何回應。而今次返來最主要係陪我屋企人，因為真係好耐冇見，希望大家畀多啲空間我哋，呢段時間多謝大家關心，辛苦晒！」
