【法證先鋒IV】執黃心穎蘇州屎！朱晨麗 張曦雯 黃浩然焗住開OT
雖然「安心偷食」事件經已告一段落，男主角許志安正式被老婆鄭秀文原諒合體健身、女主角黃心穎避走美國收埋自己，不過蘇州屎都仲有一大籮有排未清，好似佢拍落嘅《丫鬟大聯盟》、《牛下女高音》幾套戲播出無期，仲有套《法證先鋒IV》搞到要重拍，成班演員度期再埋位，監製梅小青都話咁樣搞一搞損失過千萬呀陰公！好彩班演員夠專業，為套劇重見天日在所不辭，早排就見男女主角黃浩然、朱晨麗同客串嘅張曦雯齊齊現身拍攝。
撰文：東方新地 圖片：新傳媒圖片、IG
《法證先鋒IV》朱晨麗 張曦雯 黃浩然 執黃心穎蘇州屎！
電視台工作本來已經夠忙碌，無喇喇又要補拍超時工作，仲要為連戲大熱天時著晒厚褸，一班演員各有各方法提神保持最佳狀態。女主角朱晨麗一到場好nice咁第一時間走去搵工作人員，原來攞幾包零食口立濕過吓口癮，至於張曦雯呢個鬼妹仔，梗係開工前整杯咖啡最實際。仲有男主角黃浩然，雖然拍攝進度緊急、精神透支又冇得返屋企湊仔陪老婆，不過見有女粉絲包圍要求合照，一樣打醒精神有求必應，呢啲咪專業囉！
朱晨麗 請食零食
《法證先鋒IV》大部分鏡頭要補拍，女主角朱晨麗當然走唔甩，一樣準時到場準備埋位，仲要為連戲大熱天時著晒厚褸焗燒豬呀陰功！
聽就聽得多電視城似係大家庭，實情花旦同工作人員感情確係好，一見朱晨麗，好體貼攞包零食畀佢提神。
張曦雯靚爆鏡
喺《白色強人》一眾女醫生當中成功跑出，成為網民公認明成北醫院最索女醫生嘅張曦雯，就算趕頭趕命趕補拍，一見鏡頭一樣靚爆鏡打個招呼先！
一人有一套提神方法，鬼妹仔張曦雯埋位前就先嚟杯咖啡。
拍攝工作仲喺準備中，張曦雯提早到場準備化妝換戲服，未上妝前一身便裝已經好省鏡。
