職工頭圍用膳東京篇｜林沚羿語言天份驚豔姜麗文難忘恩愛夫婦12年無嘈
向來致力推出不同類型旅遊及飲食節目的 J2（82 台），昨晚（19日）起逢周一至周五晚 8 時 30 分、推出由姜麗文（Lesley）及 J2er 林沚羿（Venus）主持的《職工頭圍用膳 東京篇》。二人將走訪東京不同特色的大小餐廳，除深入廚房重地直擊各店招牌菜的獨門烹調方法，亦會與各店老闆促膝詳談了解經營理念，及與職工們齊齊安坐店內飯堂用膳，透過各有特色的員工餐，體驗東京食店的人‧情‧味。
本周兩位主持先後走訪了米芝蓮燒鳥串燒店、家族壽司店、港式點心餐廳、法式鴨肉拉麵及台式餐廳，分別品嚐了 CP 值高且各具風味的員工餐，包括麻婆豆腐炒飯、味道一流的「剩菜」手捲、靚湯不可或缺的廣東菜、法式鴨肉拉麵，及炆元蹄＋潤餅＋酸辣湯＋蚵仔煎台式盛宴。其間兩位主持除大晒流利日語，Venus 還同場加映韓語、英語、普通話，以及簡單的德語等。問到 Venus 為何咁犀利，她竟驚揭日語是自學：「因為從小就喜歡看日本動畫，咁就慢慢學識咗。韓語係因為我喜歡嘅音樂大部分都係韓語，同埋我 17-18 歲嗰陣想做練習生，所以上過幾堂。」
談到深入東京各餐廳飯堂感受，曾在香港餐廳打過的工 Venus，坦言很喜歡那種「家的氣氛」，她說：「好似喺串燒店，佢哋無論工作同食飯都有講有笑，平時啲人話日本人階級觀念好強，但佢哋完全冇嗰種感覺，而負責煮員工餐嘅員工仲會特登出去買餸煮員工餐，好有家嘅縮影。」Venus 又謂難忘店主對員工的尊重及用心：「好似台灣師傅咁，佢幾辛苦都堅持要親自煮員工餐，一來佢想員工食嘅嘢同客人一樣味，二來佢話見到員工咁努力，自己都要努力。」
Lesley 則分別跟隨了日籍夫婦及香港點心老師傅，到魚市場入貨及學包中式點心，其間Lesley 大晒「為食」表情包，反眼之餘及真人示範為何「好味到震」。Lesley 笑言最難忘是沒想過餸頭餸尾也可以是人間美食：「日籍夫婦因為成間店得佢哋兩個，所以員工餐好簡單，都係用啲頭頭尾尾嘅魚肉嚟到包手捲食，但原來呢啲望落唔靚嘅部分先至最好食。」她又謂很羨慕每天一起工作的日籍夫婦、12 年未曾鬧過一場交︰「老闆話佢哋遇到問題第一時間係講出嚟，咁就好自然會去咗解決問題而唔係鬧交。」Lesley 續指港式點心餐廳的師徒情，也大大觸動了她：「佢哋一個係香港人，一個係日本人，10 年以嚟都係只靠動作同感覺溝通，所以兩個人嘅廣東話同日文都冇進步過。」Lesley 為了讓老師傅能將退休感言好好傳達給徒弟，還專誠為二人充當翻譯：「見到佢哋兩個講完之後，對住對方係咁點頭道謝，就覺得好有愛。」
