陳奕迅演唱會｜加位唔夠再加兩場 Eason避感染婉拒收禮物
陳奕迅 嘅聖誕跨年演唱會除夕去到第18場，除咗早前因應政府放寬防疫措施，開放全部坐位之外，主辦單位喺元旦又宣佈，再加開1月10號同11號兩場表演，8成門票1月5號上午10:00公開發售。
雖然再加兩場又可以話有多兩萬人可以欣賞，不過唔知係咪受 張敬軒 因為確診而要將個唱部份場次延期所影響，Eason喺除夕呢晚就婉拒入場歌迷所送嘅花同禮物，仲幽默咁話話小心使得萬年船呀。
呢晚 曾寶儀 據知亦係座上客，而Eason亦再次獻唱名曲《浮誇》，令全場尖叫不斷，但係最後嘅高音就收起唔唱，仲叫大家上網重溫之前嘅片段，認真鬼馬呀。呢晚係2022年最後一晚，Eason喺同全場觀眾一齊倒數之前，就祝福觀眾放下心中鬱結，好好迎接新一年來臨喇。
至於呢晚嘅Encore環節，佢就以雙語唱出《歲月如歌》同《兄妹》，令大家聽出耳油，而離場前佢仲隔空同歌迷打招呼互祝新年快樂呀。
網民點睇？
NO.1 HK SINGER
King of Cantopop 👑👑👑 = Eason Chan
撰文：OS編輯部圖片來源：youtube
